דברים לב

א הַאֲזִינוּ הַשָּׁמַיִם וַאֲדַבֵּרָה  {ס}  וְתִשְׁמַע הָאָרֶץ אִמְרֵי-פִי.  {ר}
ב יַעֲרֹף כַּמָּטָר לִקְחִי  {ס}  תִּזַּל כַּטַּל אִמְרָתִי  {ר}
כִּשְׂעִירִם עֲלֵי-דֶשֶׁא  {ס}  וְכִרְבִיבִים עֲלֵי-עֵשֶׂב.  {ר}
ג כִּי שֵׁם יְהוָה אֶקְרָא  {ס}  הָבוּ גֹדֶל לֵאלֹהֵינוּ.  {ר}
ד הַצּוּר תָּמִים פָּעֳלוֹ  {ס}  כִּי כָל-דְּרָכָיו מִשְׁפָּט  {ר}
אֵל אֱמוּנָה וְאֵין עָוֶל  {ס}  צַדִּיק וְיָשָׁר הוּא.  {ר}
ה שִׁחֵת לוֹ לֹא בָּנָיו מוּמָם  {ס}  דּוֹר עִקֵּשׁ וּפְתַלְתֹּל.  {ר}
ו הַ לְיְהוָה תִּגְמְלוּ-זֹאת   {ס}  עַם נָבָל וְלֹא חָכָם  {ר}
הֲלוֹא-הוּא אָבִיךָ קָּנֶךָ  {ס}  הוּא עָשְׂךָ וַיְכֹנְנֶךָ.  {ר}
ז זְכֹר יְמוֹת עוֹלָם בִּינוּ שְׁנוֹת דֹּר-וָדֹר  {ס}  שְׁאַל אָבִיךָ וְיַגֵּדְךָ זְקֵנֶיךָ וְיֹאמְרוּ לָךְ.  {ר}
ח בְּהַנְחֵל עֶלְיוֹן גּוֹיִם  {ס}  בְּהַפְרִידוֹ בְּנֵי אָדָם  {ר}
יַצֵּב גְּבֻלֹת עַמִּים  {ס}  לְמִסְפַּר בְּנֵי יִשְׂרָאֵל.  {ר}
ט כִּי חֵלֶק יְהוָה עַמּוֹ  {ס}  יַעֲקֹב חֶבֶל נַחֲלָתוֹ.  {ר}
י יִמְצָאֵהוּ בְּאֶרֶץ מִדְבָּר  {ס}  וּבְתֹהוּ יְלֵל יְשִׁמֹן  {ר}
יְסֹבְבֶנְהוּ יְבוֹנְנֵהוּ   {ס}  יִצְּרֶנְהוּ כְּאִישׁוֹן עֵינוֹ.  {ר}
יא כְּנֶשֶׁר יָעִיר קִנּוֹ עַל-גּוֹזָלָיו יְרַחֵף  {ס}  יִפְרֹשׂ כְּנָפָיו יִקָּחֵהוּ יִשָּׂאֵהוּ עַל-אֶבְרָתוֹ.  {ר}
יב יְהוָה בָּדָד יַנְחֶנּוּ  {ס}  וְאֵין עִמּוֹ אֵל נֵכָר.  {ר}
יג יַרְכִּבֵהוּ עַל-במותי (בָּמֳתֵי) אָרֶץ  {ס}  וַיֹּאכַל תְּנוּבֹת שָׂדָי  {ר}
וַיֵּנִקֵהוּ דְבַשׁ מִסֶּלַע  {ס}  וְשֶׁמֶן מֵחַלְמִישׁ צוּר.  {ר}
יד חֶמְאַת בָּקָר וַחֲלֵב צֹאן  {ס}  עִם-חֵלֶב כָּרִים וְאֵילִים  {ר}
בְּנֵי-בָשָׁן וְעַתּוּדִים  {ס}  עִם-חֵלֶב כִּלְיוֹת חִטָּה  {ר}
וְדַם-עֵנָב תִּשְׁתֶּה-חָמֶר.  {ס}  טו וַיִּשְׁמַן יְשֻׁרוּן וַיִּבְעָט  {ר}
שָׁמַנְתָּ עָבִיתָ כָּשִׂיתָ  {ס}  וַיִּטֹּשׁ אֱלוֹהַּ עָשָׂהוּ  {ר}
וַיְנַבֵּל צוּר יְשֻׁעָתוֹ.  {ס}  טז יַקְנִאֻהוּ בְּזָרִים  {ר}
בְּתוֹעֵבֹת יַכְעִיסֻהוּ.  {ס}  יז יִזְבְּחוּ לַשֵּׁדִים לֹא אֱלֹהַּ   {ר}
אֱלֹהִים לֹא יְדָעוּם  {ס}  חֲדָשִׁים מִקָּרֹב בָּאוּ  {ר}
לֹא שְׂעָרוּם אֲבֹתֵיכֶם.  {ס}  יח צוּר יְלָדְךָ תֶּשִׁי  {ר}
וַתִּשְׁכַּח אֵל מְחֹלְלֶךָ.  {ס}  יט וַיַּרְא יְהוָה וַיִּנְאָץ  {ר}
מִכַּעַס בָּנָיו וּבְנֹתָיו.  {ס}  כ וַיֹּאמֶר אַסְתִּירָה פָנַי מֵהֶם   {ר}
אֶרְאֶה מָה אַחֲרִיתָם  {ס}  כִּי דוֹר תַּהְפֻּכֹת הֵמָּה  {ר}
בָּנִים לֹא-אֵמֻן בָּם.  {ס}  כא הֵם קִנְאוּנִי בְלֹא-אֵל  {ר}
כִּעֲסוּנִי בְּהַבְלֵיהֶם  {ס}  וַאֲנִי אַקְנִיאֵם בְּלֹא-עָם  {ר}
בְּגוֹי נָבָל אַכְעִיסֵם.  {ס}  כב כִּי-אֵשׁ קָדְחָה בְאַפִּי  {ר}
וַתִּיקַד עַד-שְׁאוֹל תַּחְתִּית  {ס}  וַתֹּאכַל אֶרֶץ וִיבֻלָהּ  {ר}
וַתְּלַהֵט מוֹסְדֵי הָרִים.  {ס}  כג אַסְפֶּה עָלֵימוֹ רָעוֹת  {ר}
חִצַּי אֲכַלֶּה-בָּם.  {ס}  כד מְזֵי רָעָב וּלְחֻמֵי רֶשֶׁף  {ר}
וְקֶטֶב מְרִירִי  {ס}  וְשֶׁן-בְּהֵמֹת אֲשַׁלַּח-בָּם  {ר}
עִם-חֲמַת זֹחֲלֵי עָפָר.  {ס}  כה מִחוּץ תְּשַׁכֶּל-חֶרֶב וּמֵחֲדָרִים אֵימָה גַּם-בָּחוּר  {ר}
גַּם-בְּתוּלָה יוֹנֵק עִם-אִישׁ שֵׂיבָה.  {ס}  כו אָמַרְתִּי אַפְאֵיהֶם  {ר}
אַשְׁבִּיתָה מֵאֱנוֹשׁ זִכְרָם.  {ס}  כז לוּלֵי כַּעַס אוֹיֵב אָגוּר   {ר}
פֶּן-יְנַכְּרוּ צָרֵימוֹ  {ס}  פֶּן-יֹאמְרוּ יָדֵנוּ רָמָה  {ר}
וְלֹא יְהוָה פָּעַל כָּל-זֹאת.  {ס}  כח כִּי-גוֹי אֹבַד עֵצוֹת הֵמָּה  {ר}
וְאֵין בָּהֶם תְּבוּנָה.  {ס}  כט לוּ חָכְמוּ יַשְׂכִּילוּ זֹאת  {ר}
יָבִינוּ לְאַחֲרִיתָם.  {ס}  ל אֵיכָה יִרְדֹּף אֶחָד אֶלֶף  {ר}
וּשְׁנַיִם יָנִיסוּ רְבָבָה  {ס}  אִם-לֹא כִּי-צוּרָם מְכָרָם  {ר}
וַיהוָה הִסְגִּירָם.  {ס}  לא כִּי לֹא כְצוּרֵנוּ צוּרָם  {ר}
וְאֹיְבֵינוּ פְּלִילִים.  {ס}  לב כִּי-מִגֶּפֶן סְדֹם גַּפְנָם  {ר}
וּמִשַּׁדְמֹת עֲמֹרָה  {ס}  עֲנָבֵמוֹ עִנְּבֵי-רוֹשׁ   {ר}
אַשְׁכְּלֹת מְרֹרֹת לָמוֹ.  {ס}  לג חֲמַת תַּנִּינִם יֵינָם  {ר}
וְרֹאשׁ פְּתָנִים אַכְזָר.  {ס}  לד הֲלֹא-הוּא כָּמֻס עִמָּדִי  {ר}
חָתוּם בְּאוֹצְרֹתָי.  {ס}  לה לִי נָקָם וְשִׁלֵּם  {ר}
לְעֵת תָּמוּט רַגְלָם  {ס}  כִּי קָרוֹב יוֹם אֵידָם  {ר}
וְחָשׁ עֲתִדֹת לָמוֹ.  {ס}  לו כִּי-יָדִין יְהוָה עַמּוֹ  {ר}
וְעַל-עֲבָדָיו יִתְנֶחָם  {ס}  כִּי יִרְאֶה כִּי-אָזְלַת יָד  {ר}
וְאֶפֶס עָצוּר וְעָזוּב.  {ס}  לז וְאָמַר אֵי אֱלֹהֵימוֹ   {ר}
צוּר חָסָיוּ בוֹ.  {ס}  לח אֲשֶׁר חֵלֶב זְבָחֵימוֹ יֹאכֵלוּ  {ר}
יִשְׁתּוּ יֵין נְסִיכָם  {ס}  יָקוּמוּ וְיַעְזְרֻכֶם   {ר}
יְהִי עֲלֵיכֶם סִתְרָה.  {ס}  לט רְאוּ עַתָּה כִּי אֲנִי אֲנִי הוּא  {ר}
וְאֵין אֱלֹהִים עִמָּדִי  {ס}  אֲנִי אָמִית וַאֲחַיֶּה  {ר}
מָחַצְתִּי וַאֲנִי אֶרְפָּא  {ס}  וְאֵין מִיָּדִי מַצִּיל.  {ר}
מ כִּי-אֶשָּׂא אֶל-שָׁמַיִם יָדִי  {ס}  וְאָמַרְתִּי חַי אָנֹכִי לְעֹלָם.  {ר}
מא אִם-שַׁנּוֹתִי בְּרַק חַרְבִּי  {ס}  וְתֹאחֵז בְּמִשְׁפָּט יָדִי  {ר}
אָשִׁיב נָקָם לְצָרָי  {ס}  וְלִמְשַׂנְאַי אֲשַׁלֵּם.  {ר}
מב אַשְׁכִּיר חִצַּי מִדָּם  {ס}  וְחַרְבִּי תֹּאכַל בָּשָׂר  {ר}
מִדַּם חָלָל וְשִׁבְיָה  {ס}  מֵרֹאשׁ פַּרְעוֹת אוֹיֵב.  {ר}
מג הַרְנִינוּ גוֹיִם עַמּוֹ  {ס}  כִּי דַם-עֲבָדָיו יִקּוֹם  {ר}
וְנָקָם יָשִׁיב לְצָרָיו  {ס}  וְכִפֶּר אַדְמָתוֹ עַמּוֹ.  {ר}
{ש} מד וַיָּבֹא מֹשֶׁה וַיְדַבֵּר אֶת-כָּל-דִּבְרֵי הַשִּׁירָה-הַזֹּאת בְּאָזְנֵי הָעָם  הוּא וְהוֹשֵׁעַ בִּן-נוּן.  מה וַיְכַל מֹשֶׁה לְדַבֵּר אֶת-כָּל-הַדְּבָרִים הָאֵלֶּה אֶל-כָּל-יִשְׂרָאֵל.  מו וַיֹּאמֶר אֲלֵהֶם שִׂימוּ לְבַבְכֶם לְכָל-הַדְּבָרִים אֲשֶׁר אָנֹכִי מֵעִיד בָּכֶם הַיּוֹם  אֲשֶׁר תְּצַוֻּם אֶת-בְּנֵיכֶם לִשְׁמֹר לַעֲשׂוֹת אֶת-כָּל-דִּבְרֵי הַתּוֹרָה הַזֹּאת.  מז כִּי לֹא-דָבָר רֵק הוּא מִכֶּם כִּי-הוּא חַיֵּיכֶם וּבַדָּבָר הַזֶּה תַּאֲרִיכוּ יָמִים עַל-הָאֲדָמָה אֲשֶׁר אַתֶּם עֹבְרִים אֶת-הַיַּרְדֵּן שָׁמָּה לְרִשְׁתָּהּ.  {פ}

מח וַיְדַבֵּר יְהוָה אֶל-מֹשֶׁה בְּעֶצֶם הַיּוֹם הַזֶּה לֵאמֹר.  מט עֲלֵה אֶל-הַר הָעֲבָרִים הַזֶּה הַר-נְבוֹ אֲשֶׁר בְּאֶרֶץ מוֹאָב אֲשֶׁר עַל-פְּנֵי יְרֵחוֹ וּרְאֵה אֶת-אֶרֶץ כְּנַעַן אֲשֶׁר אֲנִי נֹתֵן לִבְנֵי יִשְׂרָאֵל לַאֲחֻזָּה.  נ וּמֻת בָּהָר אֲשֶׁר אַתָּה עֹלֶה שָׁמָּה וְהֵאָסֵף אֶל-עַמֶּיךָ  כַּאֲשֶׁר-מֵת אַהֲרֹן אָחִיךָ בְּהֹר הָהָר וַיֵּאָסֶף אֶל-עַמָּיו.  נא עַל אֲשֶׁר מְעַלְתֶּם בִּי בְּתוֹךְ בְּנֵי יִשְׂרָאֵל בְּמֵי-מְרִיבַת קָדֵשׁ מִדְבַּר-צִן עַל אֲשֶׁר לֹא-קִדַּשְׁתֶּם אוֹתִי בְּתוֹךְ בְּנֵי יִשְׂרָאֵל.  נב כִּי מִנֶּגֶד תִּרְאֶה אֶת-הָאָרֶץ וְשָׁמָּה לֹא תָבוֹא אֶל-הָאָרֶץ אֲשֶׁר-אֲנִי נֹתֵן לִבְנֵי יִשְׂרָאֵל.  {פ}